外號超級丁的丁冠豪，今季開倉迅速打響名堂，成績固然有目共睹，更誇張係短短三個月已爆倉掃馬，更曾經因養馬量超額被馬會罰錢，由此可見，能夠留得在丁廐的馬，未必匹匹精兵，但起碼具爭勝本錢。

周末（29日）沙田泥草混合賽，第五場三班1000米草地，「勝利寶石」今季由丁冠豪接手立即贏兩場，練者不但沒有掃走這匹八歲老馬，依然悉心訓練主攻直路賽，實力肯定未見盡，今次盃賽當前，可贏馬捧盃進一步省靚招牌。

「勝利寶石」年輕時短途成績甚佳，不過隨着年事漸高，上季未能取得頭馬，評分因而下調甚多。丁冠豪今季接手後，老馬呈迴光勇，一口氣連贏兩場，重現盛年時氣勢。

外界以為「勝利寶石」加分後會被掃走，不過練者繼續重視，上場跑直路賽早段太慢，但最後300米在接近內欄較差的跑線，仍可逢馬過馬跑第六，如非早段失機，已大有機會完成季內三捷。

「勝利寶石」距上賽個多月，期間操練仍非常積極，似有搏盡一時之意，難得身形依然飽滿，狀態仍處高位，鬥志無須懷疑，奪標呼聲相當高。