「第21屆上海電影節」噚日揭幕，今晚則舉行「微博之夜」，大會頒發多個獎項，其中噚晚性感現身嘅劉嘉玲，今晚換上一身黑色裝扮，大V領少露事業線，獲頒最具影響力銀幕人物，大會安排徐克導演頒獎俾劉嘉玲，劉嘉玲得獎後仲開咗個玩笑：「我沒想到我的獎比你大，姜文！」又反問主持人點解自己會獲獎。其後，主持再要求劉嘉玲發表感言時，佢話：「我沒甚麼感言，就是獎比姜文大！」引嚟全場爆笑。

至於被笑「獎唔夠大」嘅姜文，就獲頒最受期待年度導演，而由佢自編自導自演嘅《邪不壓正》，就得最受期待年度電影，有份主演《邪》片嘅彭于晏喺台下大力鼓掌恭賀。

另外，大會頒發突破表現演員獎俾大陸人氣男星李易峰及女演員娜扎，李易峰好鬼馬，出場後喺台上跳起，與身邊娜扎比身高。而李易峰更表示，希望自己可以挑戰媽媽嘅角色。

精選娛聞，喺晒《娛果》
http://fb.com/appledailyent