卓能（131）主席趙世曾居住喺港島摩星嶺嘅「趙苑」今年10月遭賊人潛入爆竊，人冇事，只係唔見咗總值約千萬元嘅古董、珠寶首飾，話唔心痛就假嘅。趙世曾諗到條防盜好橋，就係出口術，「宣佈」屋企值錢嘢已經拎走晒，屋企已經冇值錢嘢㗎喇，即係叫賊仔死咗條心，唔好再去白費心機。
趙世曾噚日自爆，「屋企已經冇值錢嘢」，又指「自己收藏嘅古董文物，已經賣咗三分一，因為多得滯，睇唔住，好麻煩」除咗出口術，佢仲喺門口請多幾個保安巡邏，又請防盜公司做緊工夫，總之就會加強防盜。

趙式芝傍實　全程冇出聲

一提到古董，趙世曾似乎又忘記被爆竊一事，講到眉飛色舞，事關投資回報可觀吖嘛，當然要晒一晒。佢話「幾十年前，買個古董幾千蚊，𠵱家已升值到幾百萬」。不過，佢認為，古董始終都冇樓市升咁多，所以他至今仍然專注發展地產業務。
雖然78歲嘅趙世曾今年8月已經話，準備交棒畀愛女趙式芝，將對方升為公司副執行主席，趙式芝噚日亦在場，不過全程冇出過聲，表現得戰戰兢兢，只係當爸爸聽唔清楚記者嘅問題，佢先至幫爸爸大聲複述一遍，亦冇補充任何答案。趙世曾當然對阿女有期望，佢話，「將職責分啲畀佢，將幾十年做生意經驗灌輸畀佢，希望佢勤力啲，盡量開會一齊開。」趙式芝應該收到啦。

李華華
mailto:[email protected]