星期日嘅英超「升班馬」大戰，白禮頓憑住希密特喺下半場一箭定江山，主場以1:0小勝對手，不過贏波功臣希密特因為喺比賽中踩到喜鵲後衛耶迪連，有機會被罰停賽三場。

30歲嘅希密特係51分鐘為白禮頓射入全場唯一入球，去到比賽尾段，電視鏡頭影到佢從後踩中耶迪連左腳小腿，但逃過咗球證馬連拿法眼。希密特賽後話今次只係意外，自己冇心踩耶迪連，如果傷到對方咁佢道歉。至於耶迪連就話覺得自己小腿有啲嘢「我乜都睇唔到，我跌咗喺地，無論係咪意外都好，宜家都冇所謂啦。」

英格蘭足總有可能會對希密特秋後算賬，令呢名以色列前鋒有機會面臨停賽三場刑罰。