【閃耀人生女人心　袁詠儀系列之7　讀書生涯】袁詠儀（靚靚）日前重返母校聖公會呂明才紀念小學，大受小學生歡迎。靚靚更分享自己的刺激初戀，當時約13歲讀女校，她說：「對方係阿哥啲同學，都係警察嚟㗎。因為阿媽唔畀嘛，越係唔畀嘅嘢就越係刺激，拖吓手去街，錫錫？梗係有啦，我話冇你都唔信啦，唔係點叫初戀啫，只到錫錫啫。」

有機做未婚媽媽

初戀僅維持一星期，因為媽咪反對而分手，靚靚說：「嗰陣時如果佢唔約束我，以我咁愛玩嘅性格，我絕對係會變成一個未婚媽媽。我公公係賣豬肉㗎，我媽咪冇讀過書，好細個就已經幫我公公賣豬肉。佢冇受過教育，但係佢好知道規矩，好識得教我呢樣嘢。我媽成日鬧我，嗰時懷疑佢唔鍾意我，可能唔係親生，邊有人咁憎我咁鬧我嘅啫？」
靚靚讀小學時，媽咪到酒樓做傳菜，將子女交到親戚家裏，靚靚開始寄人籬下的生活，她說：「嗰時好慘，想睇電視又冇得睇。媽咪每日放工就接番我哋，但係對方呢就係嗰啲，喂你斬隻雞上嚟啦，斬啲料上嚟啦。如果我阿媽斬得料上嚟，都唔使出去做嘢啦，我覺得對方冇體諒過我媽咪。」

採訪：陳月媚
攝影：林德雄
化妝：Kerry Wong
髮型：Sam Pan @Muse Hair