同一日出現縮表（當係預期之中）加埋標普調低中國評級兩個利淡消息，執筆時新加坡黑期都仲可以微升，市況絕對算得上偏強，雖然近期二三線股炒到慶烚烚，但係今日除咗兩隻消息股佳兆業（1638）同中金（3908）可以大升之外，似乎落後股表現罕有地好過強勢股，其中慢慢睇到中港券商股轉強，國泰君安國際（1788）、耀才（1428）呈圓底，醞釀轉強都一段日子，隨住港股成交增加、氣氛高漲，呢類股追落後唔過份。另外，就連低殘多年嘅食品股康師傅（322）都慢慢變強勢股。小弟建議觀察多一日半日，如果去到聽朝開市後一個鐘，中港券商股等等落後股表現仲好過內房股、汽車股，就可以確認追落後成為新主題，到時或許要放棄高追最強勢板塊嘅策略，而上述三隻股都係唔錯追落後選擇。

雖然近排個個話炒二三線股唔使理指數，但由7月尾至今恒指形成橫行格局，連續4日守穩二萬八樓上，形勢上似乎係一浪比一浪高，準備爆上，似過RSI頂背馳見頂訊號。假如恒指真係爆上，都要靠騰訊（700）、滙控（005）升勢加快助燃。雖然牌面上港股不差，但兩手準備，止蝕可放喺近期連番守得住嘅保歷加中軸，啱啱延伸到27,881點，如果短期內恒指收市價明顯跌穿呢個位，就掉返轉減持避險。

晉佳

蘋果財經，關心你飯碗
http://fb.com/appledailyatm