法甲聯賽喺周三踢完2017年最後一輪比賽之後就進入歇冬期，明年一月中先重開。尼斯喺周三主場迎戰波爾多，巴洛迪利又做英雄，佢喺上半場36分鐘入波，助尼斯以1:0小勝全取三分。近期弗到爆嘅巴神，提早許新年願望，除咗想重返意大利國家隊之外，仲想返去佢母會國際米蘭。

巴神喺今季法甲已經入咗10球，連同盃賽最近連續5場比賽入波。巴神話：「我睇到意大利喺世盃附加賽被瑞典踢出局真係好傷心，到依家都唔明點解雲杜拿（當時國家隊主帥）唔揀我。無論如何重返國家隊係我一直以嚟嘅夢想。有人問我會唔會返去國際米蘭，國米係偉大嘅球會，我亦喺度過咗好開心嘅日子，話唔埋我會返去嘅。」

--------------------
狂賀！BFB系列推出5?周?年，精彩活動為您安排，立即登入速享專屬優惠！