繼周秀娜後，與張鐸結婚後並移居內地嘅兒歌天后陳松伶，原來亦準備在港推出自家胸圍品牌S.Bra（內衣文化）。為準備進軍商界，松松近日返港全身投入打理生意，包括跟進新舖裝修，以及上堂學習胸圍文化等等。

前日下午1點幾，松松喺尖沙嘴上堂後，同兩位生意拍檔到尖沙嘴新舖睇裝修，之後再到美麗華商場開餐，見松松不停同拍檔密斟，睇嚟心情相當興奮。

記者前日致電松松，問佢係咪轉行賣胸圍時，佢透露同鄭明明一齊投資內衣生意。松松話：「自己年紀慢慢大，開始覺得自己身形點解唔一樣嘅？原來可以透過內衣穿着將體形線條改變，比瘦身減肥嚟得有效。我哋唔係淨係賣胸圍，而係配合療程，幫女士們護理乳腺、淋巴。」會否自己做生招牌拍內衣廣告？松松笑言：「我自問呢方面（身材）比較差，所以會搵model。」

據悉松松今次投資七位數字，雖然佢冇參與設計，但就要不斷上堂。松松話：「我要學內衣文化有關知識，包括內衣穿着等等，譬如你好辛苦儲錢買間房，但最貴嘅房其實係你嘅乳房，保護同護理得唔好，會好大問題。」做女人多年，到o依家先學習認識乳房？松松話：「都唔遲㗎，我對呢個由細到大日日對住嘅朋友，原來傷害性有幾大自己都唔知，原來我好對唔住自己乳房，我有虐待佢，對佢唔好，將來佢有乜嘢問題係我受罪，所以o依家要重新認識佢。」