電子競技呢項運動喺好多地方都冒起緊，2022年杭州亞運已經列入正式比賽項目，2024年巴黎奧運就考慮緊（新聞連結： http://bit.ly/2y5i2X4 ），台灣天王周杰倫亦都有一隊「J戰隊」，呢股熱潮，終於吹到嚟香港，容祖兒同洪卓立今日就喺觀塘出席「英皇電競」成立發佈會。

祖兒笑指最近鍾意打手提電話遊戲，沉迷到要用錢去打，不過好彩佢嘅上限都係400蚊，但係有件事令佢唔停唔得，祖兒話：「對住螢光幕太耐，我睇嘢有啲out focus，所以我叫自己停一個禮拜。」問佢有冇同男友「師兄」劉浩龍一齊打機？祖兒表示：「唔話你知！」師兄係咪鍾意玩足球遊戲？祖兒繼續話：「唔話你知！」講到謝霆鋒曾經好沉迷打機，祖兒話：「佢直情廢寢忘餐，腳趾甲伸晒出嚟，講笑啫！」細個會唔會偷入機舖？佢笑住話：「媽咪以前喺宇宙商場有間舖，我就睇人哋打紅白機囉，我就唔入機舖，覺得呢啲地方好壞……爆咗自己年齡添！」

至於洪卓立係呢個「電競」業務嘅小老闆，未有透露投資幾多錢。問佢係咪好鍾意打機？佢話：「係呀，有次女友問我嘢，我遲咗15分鐘問番佢係咪問我嘢，佢有少少嬲，但後來習慣咗，不過我唔會打到唔瞓覺、唔沖涼，0依家公司發展呢個業務，我就更加名正言順去打機。」