今屆世界盃冇份講波，可以講講有線電視的舊戰友，一班講波佬。
蔡文堅堅哥是定海神針，有幾十年新聞部工作經驗，無論外型與談吐都有說服力。德能總帶點架勢的感覺，可能由於他經常踏足香港大球場又中文又英文主持活動，很壓場。榮基的沙聲有麥炳榮Feel，講得德國波多，對德國球員最有感情。邱仔踢而優則講，以球員角度講感受，見到高治帶波落底斬個靚波傳中，邱仔立即講句：「估唔到高治都有腰喎」，底線斬波最緊要有腰力嘛。鬼Sir張志德作戰經驗豐富，球員們是否插水做戲逃不過其法眼。葦如與柏翹成日笑笑口好Nice咁樣，聲音亦叫人聽得舒服。

馮奇是有線四小強之一，乾乾淨淨充滿陽光活力的後生仔，有外型又有學歷，兼具運動員的積極態度，唔知識唔識唱歌做戲，做幕前都應該有一番作為。阿潘的造型與講波風格都很有火，講得意大利波多，令本來已經浪漫的阿潘更浪漫。Keyman是瀟灑型，談笑風生間中插一句，往往一語中的。阿潘與Keyman都是講波自由人，跟柱躉式資料型拍檔講波最有火花，但若兩人同時落場，一隊波有兩個自由人便有點就住就住的感覺。
世界波好睇，但講波佬也非常重要，睇好波之餘也需向講波佬們致敬。其實有線的一班講波佬都已經算幸福，講波最緊要新鮮熱辣，難為其他電視台的老行尊講波佬，明明是一場隔夜波但仍要扮唔知結果，在節目中扮推測球隊實力及扮估波膽，講波之餘仲要俾戲，真係辛苦晒。