隔牆有耳:王光亞嘆清淡無翅宴 - 李八方

蘋果日報 2011/06/12 00:00


港澳辦主任王光亞首度訪港,煲呔自然要高規格迎賓,噚晚喺禮賓府舉行晚宴款待王主任。
甜品軟芝士餅
八方發現呢餐其實算清淡,頭盤四小碟後只有六道菜,包括金腿白雪蒸大蝦皇、淮山杞子螺頭燉雞湯、珊瑚玉帶扒芥菜膽、清蒸東星斑、芝麻鹽焗雞以及清香荷葉飯,最後就有軟芝士餅做甜品,據聞唔少座上客都對無翅家宴好滿意。煲呔最後向王光亞送上「雙魚吉慶」金箔擺設做紀念品,王光亞就以一個花樽做回禮。
好多特區主要官員都有出席,包括一哥曾偉雄,成班副局長亦空群而出參與晚宴。據現場記者所見,三司之中以財爺曾俊華最早到,佢噚日仲獲安排去落馬洲口岸迎接王光亞,唔通係因為佢已經提早墮馬,冇得選特首反而一身輕,唔似得唐唐咁惹火,只要同王光亞握手,都會被認定獲得中央欽點?