日前 香港 爆出廁紙荒，有圈中人爆料，其中一個源頭直指是楊怡胞姐、大台藝員楊卓娜，有疑似楊卓娜在藝人群組內，聲稱廁紙將因封關令物流停頓：「短期內冇廁紙，尤其係卷裝紙巾，你哋考慮吓使唔使買少少。」

對於疑似聲帶流出，楊卓娜回覆傳媒承認：「我有喺劇組提大家，有需要買少少，但冇叫大家囤貨，我都係收到消息，所以買咗兩三條，因為屋企人多。」楊卓娜解釋事件始末：「當時喺群組，大家傾緊，有同事話喺一田買唔到，畀人掃晒，我咁啱喺超市搵緊紙巾，我同佢分享，我喺西貢呢頭紙巾都畀人買晒，所以我好心提醒大家一句。」

楊卓娜再三澄清：「其實唔需要恐慌，我只係買番自己需要嘅嘢，人哋去搶米，我從來冇搶，如果大家都搶，市面真係唔夠物資，所以我覺得善意提醒係需要，喺負能量情況下互相關照，出自有愛嘅心，但唔需要製造恐慌囉。」

至於聲帶被藝人流出，楊卓娜說：「我只係好心提醒相熟同事，如果屋企有需要就買啲，唔使恐慌，佢哋攞咗嚟做新聞都冇辦法，我只係出自好心提醒身邊朋友。其實我已經知道邊個群組發出去，始終大家都係同事，唔想惹起不必要是非，唔想傷害大家感情，我唔係介意聲帶流出去，我清楚自己講過乜內容，冇傷害性。雖然大家可能誤會我，但總會忘記。」

對於被指幫某品牌廁紙宣傳，她否認：「梗係唔係啦，我收到消息佢哋停廠，所以買番自己用開嘅牌子，係宣傳都唔喺自己群組宣傳啦，係都出去同人宣傳啦，好好笑。唔存在我幫品牌做宣傳，唔存在我製造謠言。」

而其胞妹楊怡回覆《蘋果》表示：「新年快樂，係咩？我唔清楚噃，應該就不會，我估係因為疫症，她好心叫人買定啲日用品同食物，唔好出街出得太頻密啫。」

-----------------------------

《果GYM》隨身播 　健身壹App過！