「犯我中華者，雖遠必誅。」

《戰狼2》嚟緊(即係聽日)會喺香港上映，拿，票房幾多呢？唔係重點嚟嘅，大家都明。重點係，上次主旋律電影《建軍大業》香港首映，出動到三任特首到場，又有成棚高官政要到場，唔知今次《戰狼2》呢部愛國電影《戰狼2》又會有咩震撼卡士？

首映將於今晚喺尖沙嘴海運戲院舉行，部戲喺大陸迄今勁收近56億人仔，問吳京事前有冇目標？佢話：「很多人都這樣問我，但我真是沒有想過。」又謙稱未知會否破60億大關：「在這部戲上映之後，已經不是屬於我了。上映之前我都說了，這部戲是無價的，因為整個團隊有 1,700人，花了很多人力物力，試過有二十人被蜘蛛咬致半身麻痺，有人被獅子咬，有人被槍指頭，大家都付出很多。我其中一場落水戲，六分鐘，差點死。」嗰場戲係講佢喺加勒比海，冇帶氧氣樽，身上纏重鉛，落水打兩分鐘，之後冇晒力，最後要人拉番佢上嚟。

吳京又話，部戲就算俾人鬧俾人插咩都好(有大陸網民批評太假、主角打極都唔死…之類)，佢都係等觀眾去評價，亦好老實咁話部戲票房過8億人仔時，佢係最開心，因為包咗底，唔使蝕。其實，呢部戲上之初，根本冇人睇好。「這部戲拍攝時都超支了兩億，現在終於可以鬆一口氣，好好去睡。」

《戰狼2》愛國愛到去非洲，吳京為宣傳呢部戲，亦去咗好多地方，香港係最後一站，唔通同外傳吳京係「新香港人」有關？吳京解釋；「因為香港是我電影夢開始的地方。」連聲多謝黃柏高、陳木勝等等。

有記者問吳京此行可有「衣錦還鄉」嘅感覺？他稱：「不是回來才有這種感覺，而且壓力很大，因為不知下一部電影(戰狼3)可以拍甚麼。《戰狼》十年前已訂下來有三部曲，有了劇本，當時第一集大家都不看好，但十年後很多事情都變了，不知要拍甚麼才好，因為劇本一定要重新整理。希望下一部可以多點國家情懷。」他又稱：「現在我的心情很緊張，因為知道電影有瑕疵。」