今年12月，反映大型私樓價格的中原城市領先指數CCL比今年所錄歷史新高回落6.7%。租樓6年的Chatster自稱有錢買樓都不買，眼見樓價持續下跌，出動睇樓，直擊灣仔2個迷你戶，上樓前態度是「望一望」、「無心動」、「無端端點會有買嘅衝動」，結果睇完單位，他竟然對一個比自己目前租住單位細一半、僅約200方呎灣仔劏房作出還價。前文提及，他不是要劈價嗎？不是說樓價即使不大跌也傾向租住先嗎？最終他會否結束租樓生涯？

帶睇樓經紀是利嘉閣地產高偉鴻（Oscar）和黃翊玲（Gina），先睇樓齡19年的慧賢軒一個實用203方呎單位，叫價475萬元。上樓前Chatster表示：「又唔係好心動，因為始終面積比我而家住嘅單位細一半。但投資來講，呢個銀碼叫做罕有。始終港島區，仲停留呢個價嘅盤為數不多，所以想嚟望一望。（價錢吸引想拍板？）無端端唔會有咁嘅衝動，除非真係好筍啦！（即是即場減價？）睇減幾多啦，減三、四成咪買囉，但唔可能。」

經紀：我覺得我中錢毒多過中樓毒

入到單位，一眼睇晒，開門見床，床頂是開放式廚房。經紀Oscar表示：「呢啲放盤比較少，近2個月樓市唔穩定，但呢個單位都好多人來睇」Oscar指區內600萬元以下、樓齡20年內，敢講這是唯一選擇。他繼續力sell：「呢個單位收租1.1萬元至1.2萬元，就算灣仔近地鐵站舊樓劏房入場費都7,000元至8,000元，你話畀多3,000蚊，住到另一個層次，好多客唔知有呢幢樓啫，如果知，好多劏房客都會想升級嚟呢度……後生仔想上車，唔想供得咁辛苦，或者阿爸阿媽畀少少首期，400幾萬，呢度真係不二之選。」

接着兩名經紀再帶Chatster睇同區樓齡34年的文石大廈一個實用246方呎單位，叫價538萬元，空間比之前一間寬敞，但打開窗見平台死雀沒人執。經紀為Chatster介紹完這個單位，記者就留低Chatster在單位慢慢睇。然後拉兩位經紀出單位外訪問他們覺得Chatster會否幫襯，Oscar回應：「問心，佢係難sell嘅客，佢睇樓睇得比較耐。好多時租轉買，最接受唔到係，例如3年前層樓400萬元，而家要480萬元，但買相同嘅嘢，並唔係佢哋負擔唔到，而係覺得遲2年，買貴咗80萬元，而更worse係搞到上唔到車……」Gina接着說：「我覺得佢會幫襯我！」

對於Chatster自認中樓毒，Oscar覺得：「你唔可以話中樓毒，香港嘅樓供不應求，點解要中樓毒呢？點解要有大灣區、明日大嶼？因為香港九龍無地，人口由600萬增加到800萬，無得話中毒，而係剛性需求。坦白講，我讀時裝出身，點解做經紀？因為錢作怪，你話中樓毒，不如話香港人中錢毒，但買樓係最易搵錢嘅一樣嘢，我係中錢毒多過中樓毒。」

見證大淡友心態動搖

訪問完經紀，就問Chatster睇完單位的感想，「慧賢軒單位係意料之內，200呎係一眼望晒，樓底比較矮少少，入到嚟覺得環境局促，但係喺灣仔區，呢個價錢，學佢地講係無得輸。如果住，我需要空間，我而家住緊個度大呢度1倍以上，叫我住就唔會。一定係買來放租，計返回報3厘唔算特別高，但我諗租金硬淨，投資者角度來講，呢個時勢，偏向值得。（有無被打動？）如果佢劈價會打動到我，而家個價錢唔可以用打動來形容。（劈幾多？）嘩，如果劈30萬，我即刻扑槌。」至於第二個單位，他認為，樓齡舊、無保安，自出自入如「無掩雞籠」，樓下食肆油煙隨時攻上來，單位對出小巷，「呢啲後欄平台，多數係兇案現場，係動物屍體伏屍地點……對比第一個盤，呢個盤無乜優勢好過佢。」

一落樓，他就着經紀向慧賢軒業主還價450萬元，堅，由年初拍到年尾，記者只是觀察者角色，不加半點意見，一直見證他由堅持不買、等緊焦土，到現在出手。被問是否參與拍攝而加強買樓意欲，他回應：「唔係！（為何出手？）450萬好值得買，因為地點。單位雖然非常細，但呢區需求真係有。都係計數，最多借九成，每月補兩、三千蚊，我覺得供得好輕鬆，絕對有能力負擔，會好積極考慮。」

「其實我心中有數，呢兩年真係要買樓。今年買定出年買，都是供到暈，買樓最好嘅時機過咗好耐。呢兩年開始急少少拍板，自己租樓耐咗，開始需要考慮係咪認真要去好固定買一層樓。幫人供樓無話蠢，呢個世界上好多人租緊樓，唔係得我一個，買早啲咪比較幸運囉，只不過香港呢個大城市，將呢個基本需求拎來炒，咁你又咁唔好彩生存係度，夾硬要參與呢個遊戲，無奈接受。」

Chatster：中樓毒深嘅人一早買咗樓 解咗毒

「香港人唔單止中樓毒，一出嚟社會已經講買樓，比起世界上任何一個大城市，香港買樓逼切性係嚴峻，除非有父幹，如果唔係，基層的人係比較痛苦，尤其而家呢個年代，後生比我哋更加辛苦。」

「我唔係好痛苦啦，過得去啦，我中毒唔算深，中毒深嘅人一早買咗樓，解咗毒！」

他還價的單位，業主一蚊不減，而他一蚊不加，而且沒回覆經紀的WhatsApp。截稿前，慧賢軒200呎劏房尚未賣出。

撰文：陳家雄
採訪：陳家雄、張嘉鎣、朱得志、陳新政
攝影：S.dragon、Kin、Kenji、Gary、細釗、黃偉傑、鄭嘉峻、陳錦源

-----------------------
屬於香港人的移民攻略
立即登入【全球樓行】
Dream House零距離