無綫話題劇《老表，你好嘢》大受歡迎，連帶劇中眾多演員都人氣急升，而因為事業唔及老婆謝安琪好而被網民戲稱做「謝繼聰」嘅張繼聰，都憑生鬼演技彈出，令佢工作大增，有望搣甩「謝繼聰」之名啦！

噚晚張繼聰出席無綫新劇《巨輪》的煞科宴，今次係佢接拍嘅第二部劇，3月更會開第三套劇《食為奴》，喺《食》劇入面，佢要剃頭演出做清朝八王爺，o依家佢努力溫習歷史練習惡形惡相，佢話：「o依家返到屋企一聲令下要令老婆同個仔有反應，平時自己係八哥。」

對於森美演出《法網狙擊》後工作量多到要推job，張繼聰笑言自己都多咗工作，但佢就盡量唔會推，反而新年會留港接更多工作，梗係啦，食住個勢嘛!