外籍老友B來港多年，生意穩定，兩年前買咗一個紅山半島銀主盤，作價千六萬，搬入去享受吓海光山色。最近半年來，豪宅價升得好急，不斷有人敲佢門，問佢肯唔肯賣，一個月前，經紀開價三千二百萬，老友B已經心郁郁，但因為鍾意間屋，賣咗唔知搬去邊，猶猶豫豫。點知上個星期，又收到一個新叫價：四千萬，老友B為之「芳心大亂」，猛咁吞口水。四千萬港紙噃，還番一千萬按揭，淨收三千萬現金，等於三百八十萬美元，返到鄉下，用八十萬美元買一間比紅山半島大兩倍嘅house，重有三百萬美金做退休金，買晒三十年國庫債券嘅話，未來三十年每年有除稅前利息收入近十五萬美元，乜都唔使做，已經可以印印腳過美國中上階級嘅生活。

老友B於是向鬼佬L問意見，鬼佬L住響山頂，九七年初有人拍門話買佢層樓，出價二千萬，佢唔肯賣，卒之等到𠵱家。鬼佬L話：「如果再有人出二千幾萬，我都係賣咯！」不過，做人就係咁，有人出價二千，你就望二千五；出夠四千，你就望五千，始終下不定決心，呢兩位老友是否會賣屋賣樓，還是未知數。但係豪宅炒到似九七模樣，就提供機會畀唔少老友甩身脫縛，移民基金又有着落。捱咗呢七年，唔少老友捱到索氣，好彩唔死得，而仔女大學畢業，本身到咗接近退休年齡，再碰上樓宇呎價過萬元嘅場面，正是最佳exit機會！