喺今夏亞洲之行發表辱華言論嘅車路士小將羅拔堅尼地，獲領隊干地證實會喺周三對諾定咸森林場英聯盃第三圈比賽披甲。

羅拔堅尼地喺亞洲之行北京站時惹禍上身，因為喺IG上載影片取笑中國人，被指辱華，遭大批內地網民聲討，結果被車仔方面立即遣返回英，亦因此要即刻喺網上發聲明道歉，仲被罰款同埋收到英足總嘅書面警告。雖然佢最尾都冇被車仔賣走，但今季就未曾披甲過。

不過，周三英聯盃對森林，呢位巴西小將將會正選上陣。干地喺賽前記招咁講：「我認為佢都意識到喺中國發生咗咩事，知道自己犯錯，但每個人都會犯錯，而佢家下好專注同好努力，已經準備為球隊上陣，同埋為自己未來爭位而戰。」

干地咁講，即係證明唔會放棄堅尼地，而佢亦證實傷癒嘅夏薩特，都會喺呢場比賽踢正選。