下星期就係聖誕節，民建聯13名立法會議員今日提早慶祝，聖誕聯歡會上一人提出一個訴求，實行向政府「送大禮」。佳節當前，民記議員個個都未「收爐」，火力十足，其中柯創盛直斥政府喺回應議員提問十足石頭，「鑽唔出血」，陳克勤就希望政府成立特別職務隊，監察四電一腦非法棄置，「如果唔係就送晒（街邊非法棄置垃圾）畀星星局長（環境局局長黃錦星）。」

香港人經常畀人話唔識放鬆，民記議員連玩遊戲都政治十分正確，玩「大電視」做動作或講提示要在場記者估答案時，現場地下用膠紙設置咗條大大的「紅線」，劉國勳都講笑話：「我從來都唔會過條紅線嘅！」呢條紅線貼到實，唔似政治紅線識飄移，唔覺意過咗界都唔會被DQ嘅，最多俾主持警告吓啫。

遊戲期間民記都不斷發放政治訊息，其中一條題目漁農界何俊賢大叫：「我哋最想立嗰條係乜法啊？」顯而易見佢哋嘅答案係23條；之後一題指住近日喺UGL事件中甩難嘅周浩鼎問：「佢近日最關注乜嘢啊？」嘩，咁問法令人好多遐想，尤其有私通事件發生過，八方都以為答案係UGL，但原來係逼爆東涌。民記連開聖誕party都政治味極濃，可能始終身在立法會，要高度戒備啦。