當年今日
關於我們

不談聯滙 - 左丁山

蘋果日報 2002/11/09 00:00


任志剛出席立法會講外滙基金盈餘,狀甚風騷。冇嘢嘅,上頭叫你交數,你有資格提前交卷,穩坐釣魚船,自然有諸內形諸外,喜不自勝。至於財赤咯喎,阿松哥,唔該你去搞掂佢。任總話外滙基金增持美元資產,我哋不可不學,橫掂利息低到無可再低,存款改為美元,完全冇損失,且可當作買保險,話之佢脫唔脫鈎。
聯繫滙率呢樣嘢,張五常教授話目前唔可以脫,鄭國漢、曾淵滄兩位教授話可以脫,脫咗對經濟有利㖭。睇嚟政府係大丈夫,話過唔脫就唔脫,話之你出邊點樣講都好。呢個特區政府膽小怕事,冇乜方寸,左丁山就信佢唔敢脫,所以揸港紙都冇乜問題,揸美金只求心安而已。
但係,聯繫滙率已成為一個好敏感嘅題目,唔少分析師俾電台訪問之前,都話明唔講聯滙,只能講公司呀、出口呀、地產市道呀諸如此類。點解咁驚呢?基本法二十三條重未曾立法啫?分析師唔肯透露原因,可以猜想得到嘅就係佢哋上頭(即係公司政策)唔想特區政府難堪,以免影響關係。電台要講聯滙,只能請大學經濟系教授講,好彩香港現時還有學術自由,將來就知道教授會唔會封埋口。若有此一日,人人自律,人人識do,香港變成新加坡,國際金融中心地位岌岌可危咯。