Oscar（涂心業）喺ViuTV《Good Night Show全民造星》一直不受人注意，直至評判蕭定一喺節目中批評佢話：「你覺唔覺得Oscar呢個名比較普通啲？會唔會好容易同人撞名？」結果，蕭定一嘅廢評一夜間令Oscar成為新聞人物，連杜汶澤都忍唔住出post寸班評判話︰「你個名太普通喇，你以後叫9527啦。」即係電影《唐伯虎點秋香》中周星馳在華府打工編號。（相關新聞︰ https://bit.ly/2PaM1p4 ）

講番Oscar，雖然喺導師劉美君同火火挺身幫佢哋講說話之後，Oscar嗰隊A4組反勝A3組，但導師為公平起見，決定喺兩組中一齊揀人淘汰，就係咁，Oscar最終被叮走，30強止步。

原來「個名咁普通」嘅Oscar，個底一啲都唔普通。

19歲；喺英國傳統貴族學校哈羅公學（Harrow School）中學畢業，係前英國首相邱吉爾嘅學弟；鋼琴演奏級，喺英國跟英國皇家音樂學院教授深造。呢幾樣，就係Oscar嘅背景資料，但估唔到，彈琴咁掂嘅Oscar會被人亂咁彈。

日前《蘋果》喺觀塘同Oscar做專訪，Oscar第一句介紹自己時都套用番廢評「好普通嗰個」嚟形容自己。Oscar憶述當時聽到蕭定一評語之後感到好唐突，仲話：「諗住佢批評我表現做得未夠好之類，佢一講呢樣我第一時間呆咗，個名係由細到大爸爸媽媽幫我改。」有冇覺得受到不公平對待？Oscar話：「冇乜，自己本身係靜少少，反而節目一開始時冇其他參賽者咁突出自己，呢個最困難。」

講到出局原因，Oscar話同蕭定一無關：「唔關佢事，我唔會為自己搵藉口，當晚的確未係發揮最好水準。可能評判喺我身上，對比其他隊友睇唔到我團火，自問係有心做件事，但嗰晚實在太夜，我係好需要瞓覺嘅人，影響咗我好多，唔關蕭定一事。」英文名被指普通，Oscar又點睇蕭定一個名呢？佢話：「冇話普唔普通，佢個名都係父母為佢而起，係代表佢或有某種意義。」

Oscar指節目出街後好多人問佢個名係咪好普通，佢就認為：「個名普唔普通係人哋對你睇法，最主要係我點樣喺觀眾同別人眼中點突出Oscar，蕭生問呢個問題對我哋日後出嚟做嘢，被人質問時好好鍛煉，任何情況下都要應付問題。」

Oscar強項係鋼琴，小時候已經係鋼琴演奏級嘅佢，之後加入了演藝學院鋼琴系，不時代表學校參加比賽，初中後到英國留學時，都有跟皇家音樂學院教授深造，對作曲亦有經驗，節目第一回合佢就演繹自己作品。雖然出局，但Oscar通過參賽平台，希望自己喺音樂上俾到人印象，佢話：「自問唱歌未係好好，會再進修，希望做到唱作歌手，唔止要識唱識表達自己，識創作、製作好重要，心目中有兩位偶像，林俊杰同張敬軒，向住佢地進發。」完成比賽後，Oscar今個月重投校園懷抱，繼續升讀科大二年級Global Business。

聽聞Oscar背後被人叫「富家公子」，屋企應該係有個錢，但Oscar解釋：「屋企只係正常家庭，由細到大父母培育以品行性格為重。中二就去咗英國傳統貴族學校哈羅公學，成個環境下好自然有咗個公子同斯文教育出嚟。」　

採訪：卓寶花
攝錄、攝影：沈健程

精選娛聞，喺晒《娛果》
http://fb.com/appledailyent