雞年賀歲盃嚟緊28號（年初一）同31號（年初四）就會喺香港大球場舉行，香港代表傑志將會同三支外隊爭標，包括泰超冠軍蒙通聯、韓職冠軍FC首爾同新西蘭冠軍奧克蘭城。其中傑志嘅初一對手兼潛在亞冠勁敵蒙通聯有錢又有「美斯」，主場球迷一定要大聲啲打氣撐自己人！

蒙通聯自從喺2007年得到財團收購兼改名，目前同武里南聯可以話係泰超兩大豪門，據報每年班費高達四億泰銖（約一億港元）；球隊舊年中斷武里南聯三連霸氣勢，歷來第四度稱霸泰超，兼攞到今年亞冠盃資格。佢哋喺E組同日聯總冠軍鹿島鹿角，以及兩支外圍賽晉級隊伍同組，其中傑志只要連過FC河內同蔚山現代兩關，就會同蒙通聯喺分組賽碰頭啦！查實蒙通聯喺2013年都嚟過香港賀歲，最終連輸畀上海上港同港聯包尾。

蒙通聯上周泰國冠軍盃以5:0大勝Sukhothai FC，打響2017年頭炮，之後就展開亞洲熱身之旅，今晚率先作客老撾同當地聯賽明星隊踢友賽，然後匆匆訪港，嚟緊仲會返主場同日聯廣島三箭爭吓盃仔，備戰二月開打嘅泰超聯同亞冠盃分組賽。

貴為泰超班霸，蒙通聯自然係泰國國家隊大戶，舊年東錦賽冠軍陣容就有九人嚟自蒙通聯，其中最出名應該係假假地踢過英超曼城嘅28歲射手鄧達（Teerasil Dangda），以及「泰國美斯」桑卡辛（Chanathip Songkrasin）。23歲嘅桑卡辛身高得1米58，但勝在夠高速同扭得，七月就會外借日聯「升班馬」北海道札幌岡薩多，事業更上一層樓，仲有個靚靚明星女友莎嘉朗（Phitchanat Sakhakon），可謂泰版人生贏家！外援方面，前紐卡素前鋒薛斯高（Xisco）同前南韓國腳李浩勝在夠實用，傑志呢關絕對唔易過！