【咁長情？】薛家燕送簽名聖誕咭 胡楓珍藏幾十年

蘋果日報 2018/09/14 17:56

薛家燕曾江胡楓入行60年
    今年係薛家燕入行60年，最近佢除咗忙於12月嘅紅館騷之外，日前佢仲錄影咗個「家燕姐全民皆Friend 60年」嘅特輯，佢仲碌盡人情牌，請咗好多老友嚟。（新聞連結︰ https://bit.ly/2p6oyKB）
    家燕姐相識滿天下，當晚擔任司儀嘅鄭旦瑞，仲封家燕姐係「登基燕」，家燕姐以登基造型出場，而佢班好友當然一呼百應。好似當年拍粵語片年代嘅好拍檔胡楓（修哥）同曾江（Ken），Ken哥仲踢爆，當年喺片場教家燕姐做功課，點知變成代佢做功課。而修哥就珍藏咗數十年，家燕姐細個時送畀佢嘅親筆簽名聖誕咭，真而重之，仲同家燕姐合唱「百花亭之戀」。
    至於久未露面嘅伍衞國，同家燕姐合唱「少女慈禧」同「大內群英」兩首歌。之後仲有曾經喺劇集《富貴門》，同家燕姐演母子嘅呂良偉專程喺外地飛返嚟，當晚兩人鮮有喺螢光幕前合唱一曲「只有情永在」。至於經典劇《真情》同《皆大歡喜》，一班演員如劉丹、李司棋、馬海倫、林漪娸、羅霖、滕麗名、馬蹄露、鄧兆尊同黎諾懿，大談當年合作嘅趣事，家燕姐仲同好拍檔司棋姐，重溫「好姨」同「善姨」嘅《真情》畫面，兩人仲首次合唱主題曲「無悔愛你一生」，之後成班人仲合唱「皆大歡喜」同名主題曲，氣氛高漲。至於一班後輩如王君馨、姜麗文、蝦頭、江欣燕等，齊齊獻聲唱出「莫負青春」一曲，令現場重現六十年代經典情懷。
    精選娛聞，喺晒《娛果》
    http://fb.com/appledailyent
    empty
    修哥同家燕姐粵語片年代已合作。
    empty
    呢張係家燕姐細個時，親筆簽名嘅聖誕咭，送畀修哥。
    empty
    曾江話以前教家燕姐做功課，變成幫佢做功課。
    empty
    「好姨」薛家燕同「善姨」李司棋合體唱歌。
    empty
    仲有做過家燕姐阿仔嘅呂良偉。
    empty
    司儀鄭丹月瑞，同嘉賓滕麗名、羅霖、鄧兆尊話當年。
    empty
    姜麗文、王君馨、家燕姐、江欣燕同蝦頭載歌載舞。
    empty
    《真情》同《皆大歡喜》演員聚首一堂。