【岳少靚靚被點名】響應田少號召 大肚甘比同紅姑接受Ice-cream Challenge
田北俊甘比袁詠儀雪糕林建岳導盲犬何超蓮Ice-cream Challenge
如果大家有啲啲印象,記得之前有個Ice Bucket Challenge,原意係想外界關注被忽視肌萎縮性脊髓側索硬化症(ALS),譬如由第一個人發起,拍一條片淋完冰水後,再tag三個人,被點名者需要喺廿四小時內接受「挑戰」,兼捐款俾該慈善團體,後嚟被指浪費水,同埋皮膚喺短時間感受極大溫差,易刺激腦部血管,引起身體不適。
點知最近網傳另一個為導盲犬協會籌款活動,性質「異曲同工」……Ice-cream Challenge,話要蒙眼食雪糕,令啲人感受失明人士嘅困難,為《導盲.Guide Dog》慈善活動籌款。
之前薯片叔同森美蒙眼食完雪糕,點名叫田少接受挑戰!
日前田少亦響應「薯片叔叔」號召,「找數」…兩位田少返母校男拔萃食雪糕,田少就點名搵劉太甘比。
目前懷孕四個月嘅甘比,噚日喺facebook貼咗條片,佢搵咗美人鍾楚紅參與呢場「挑戰」為慈善出一分力,而片中嘅場地就係劉家大宅,身後有甘比最愛嘅企鵝公仔。紅姑認真咁講:「我o依家先知道,香港有18萬視障人士,但導盲犬就唔多過30隻。」甘比同紅姑就用1分鐘時間,去體驗一下,平時好簡單做到嘅嘢,但失明人士要做,就比較有少少困難。
甘比先tag咗鍾意食雪糕嘅林建岳、「靚靚」袁詠儀同何家千金超蓮。
甘比同紅姑一開始都互相問個甜筒喺邊,叫對方唔好郁,紅姑就問點解大肚嘅甘比可以食得咁快,甘比笑笑口:「我日日都食雪糕,我o依家好似食緊啲紙巾,可唔可以搣一搣啲紙巾先。」紅姑亦都食到成口雪糕。
片尾時,紅姑好感慨:「我食晒,真係好大杯,咁o依家我真係感受到,原來咁平時做咁簡單嘅嘢,對視障人士嚟講係……我哋真係要珍惜。」佢哋都希望可以有更多導盲犬及資源幫助視障人士。
《導盲.Guide Dog》Ice-cream Challenge慈善活動,接受挑戰嘅人,要揀一個朋友成為拍檔,兩人蒙住眼,一隻手放身後、另一隻手則攞起甜筒,喺一分鐘內互相餵對方食完,過程中兩人唔可以接觸對方身體,完成後錄製視頻放上網,然後tag三個朋友接力參與兼捐款。
搵埋好友紅姑一齊接受Ice-cream Challenge
劉太甘比一向鍾意食雪糕,有時接囡囡放學都會買軟雪糕食