【20:00】警方回應事件

上個禮拜五「牛肉乾」先啱啱加咗價，估唔到咁快就有市民因為抄牌問題，同警員發生咗拗撬。喺噚日（6月4日）晏晝一點，有個客貨Van司機喺深水埗福華街黃金電腦商場對出禁區，懷疑違例停車，期間警員想抄佢牌，有人就好唔合作，現場仲有人嗌晒「差人打人添」；結果驚動到3、4部警車到場增援，十幾個警員仲一度揸晒警棍長電筒添，認真大陣仗。

目擊者王先生經過現場拍咗片，佢話事發時架客貨車喺禁區停車，司機見到有警員，於是就駛走部車，但客貨車駕出一半到路中心，就俾警員截停，之後就發生拗撬。王先生話喎，聽到警員叫個客貨車司機將架車泊埋一邊，泊番好先，點知個司機就好激動咁同警員講：「喺你叫我停車㗎，而家又話泊番好先，我有車Cam影到晒㗎，現場咁多人都可以做證㗎！」

王先生話見到兩個警員一度想捉住個客貨車司機，想制服佢，但個司機「揈」開咗警員隻手，現場一度聽到有人大嗌：「差人打人呀！」其後有警員Call上台嗌增援，唔使5分鐘就有3、4部警車到場，十幾個警員落車，仲揸晒警棍長電筒添，但事後發現對方得一個人，先收番埋啲警棍。

之後結果點呢？王先生就話無再睇落去，但佢就認為件事本來好小事，個客貨車司機可能躁咗，而咁多警員到場處理，亦都覺得係誇張咗囉。

警方發言人表示，警員噚日巡經福華街，見到一部客貨車違泊阻塞交通，向39歲姓吳男司機發出定額罰款通知書，司機一度情緒激動，但之後回復平靜離開。警方在事件中未有拘捕任何人。

你敢爆，我敢獎！ 即Call《蘋果》24小時爆相爆片熱線 ：63836568