59歲BMA、Red MR老闆羅傑承今日榮升外父。佢同首任前妻所生嘅長女羅雪儀（Cherry）今日同未婚夫Colin共諧連理。

下午4點，一對新人聯同羅傑承一齊出嚟俾傳媒影相，新娘Cherry同老公Colin一齊接受訪問時，就表示噚晚好緊張，但到朝早就已經唔識得緊張：「今日時間好緊湊，所以冇時間（緊張），婚禮上好感動，見到好多由外地番嚟嘅親友。」而Cherry亦話收到Daddy同朋友都的影片，覺得好感動：「尤其係Daddy嗰條片，係用我同屋企人嘅卡通畫像造成，Daddy話要打破傳統，唔用說話去講，不如用動畫去表達，自己本身都想忍住唔喊，但最後都忍唔到，估唔到Daddy咁有心思。」

問老公Colin有冇俾驚喜Cherry又或有表演環節？佢就好怕醜咁話：「冇呀，留番喺屋企先俾佢睇。」Cherry指今晚佢哋會以Party形式進行婚禮，之後再同家人食晚飯，問佢哋會唔會快啲造人？佢就話：「順其自然。」而Cherry又透露下年先去渡蜜月：「因為今年會去瑞士滑雪、返去我讀大學時嘅地方，因為好多朋友喺嗰邊，到時一定會開Party同朋友狂歡。」問到佢老公Colin係唔係舊同學？佢話：「佢係我舊同學介紹嘅，佢喺英國讀書，（老公點求婚？）其實喺兩年前求婚嘅，我哋一齊6年，但因為我哋好忙，所以上年先開始籌備婚禮。」而Cherry最後又表示要多謝陳貝兒幫手做司儀。

精選娛聞，喺晒《娛果》
http://fb.com/appledailyent