一場球賽嘅主角，通常都係球員，間唔中都會有啲亂嚟嘅球證搶吓鏡嘅。不過，雖然有時旁證都會畀人鬧得好甘，但其實大部份連個名都冇人知。周日晚熱刺炒曼聯3:0場波，呢位叫EddieSmart嘅旁證就醒喇，成功上位。

球證上位，通常都係因為誤判，但呢位「聰明仔」就係因為嗰種專業嘅態度。話說Eddie佢喺球員通道等出球場嗰陣，好認真咁樣彈吓彈吓熱身，後面嘅卡域克都比下去。呢一幕畀鏡頭捕捉到，Eddie佢就成咗名。

講起專業，曼聯就真係唔夠專業喇。周日晚場波佢哋遲到，搞到波場延遲30分鐘先開得，全世界等佢哋。如果係學界比賽，一早判咗輸0:3啦（雖然最後真係輸0:3），但英超咁多商業因素，先唔會咁樣取消場波。

你可能會話，曼聯遲到係因為球場附近太塞車，唔關佢哋事。各位打工仔球迷試吓下次遲到嗰陣同老闆講：「公司附近塞車，所以遲囉。」你老闆九成會答你：「哦，你唔識早啲出門口嘅？」

體蘋果facebook專頁↓↓↓
http://fb.com/appledailysports