早前車保羅同尹揚明喺西環紙紮舖拍外景,而Mr.樂隊成員MJ亦客串演出。劇中演識得茅山術嘅尹揚明話:「同車保羅未入行已經識,以前拍嘢都未試過同場做戲,今次佢係做茅山師兄八爺。」問佢到紙紮舖拍嘢驚唔驚?佢話:「紙紮舖拍嘢都見慣晒,細細個都已經上香拜神,不過原來啲祭品咁先進,電話、跑車都紮到,真係要乜有乜!」又透露最近工作好多,要不斷遷就檔期:「近排又接咗電影啦!我一向好少捱夜拍攝,呢晚一定會通宵,第二日仲要接電影嘅中班。」
車保羅亦多咗好多人搵佢傾合作,不過就話好多工作都係「冇米粥」:「不過冇乜所謂,橫掂我都有份正職,要幫手嗰時咪盡量合作,𠵱家經濟生活係好咗。」
撰文:馮仁昭