曾鈺成喺《am730》報章專欄話喎，有啲批評者指佢不自量力，點解？因為連立法會都冇管好，竟然妄想做特首？而話佢冇管好立法會嘅指控，仲要唔只針對佢嘅能力，仲關於佢嘅立場同操守，引述聽聞有官員話喎，兩年前嘅財委會主席冇管好財委會，係有心無力；佢冇管好立法會，則係有力無心喎，仲話有「高人」聲言，只要換咗主席，行政立法關係問題就會解決。
嘩，講到曾主席一戙都冇咁㗎？但明明佢在任主席時，泛民同政府中人都讚好㗎喎，至少係肯溝通嘅開明作風。噢，咁又係，呢種作風同「梁粉」非友即敵嘅作風格格不入，所以有人睇唔順眼放箭都唔出奇。大家都冇理由唔記得，曾鈺成自爆2012年盛傳要參選時，即刻「有人搞黑材料」，曾鈺成當時話相信黑材料來自梁營，而喺曾鈺成考慮選特首後，建制圈即刻有人插曾鈺成同泛民同聲同氣、點會獲中央信任呀？咦，唔知呢啲暗箭，喺邊度嚟㗎呢？話同選特首冇關，大家又信唔信呢？
而事實上呢，曾主席亦非省油的燈，點會唔反擊？但就一貫嬉笑怒罵，四両撥千斤。佢明言，有關「主席都做唔好」呢啲咁嘅指控，自己要深切反省之餘，都祝願佢哋判斷正確㗎，希望「新的立法會主席選出之後，就如他們所想，行政立法關係從此一帆風順」。八方都想睇吓下屆主席有幾咁厲害？