北韓幾時同世界接軌冇人估到，但「商品大王」羅傑斯就相信北韓「𠵱家冇，但係將來會有」。羅傑斯認為，北韓只要同世界接軌，喺北韓買農地並非天方夜譚，塊農地仲有機會大幅升值，早買早享受咁話。
羅傑斯最近接受傳媒訪問，冇再叫人撈黃金同買銀，佢估計，環球醞釀債務危機，銀紙越來越唔值錢，揸磚頭最穩陣，正確啲講，買地嘅防守力最強。
曾經騎電單車環遊世界嘅羅傑斯仲話，最想去北韓買農地，只要北韓融合環球市場，地價將會升唔停㖭。
講開買樓買地，現居新加坡嘅羅傑斯都話，亞洲樓好貴，仲點名指出內地部份城市、香港同新加坡樓價超貴。羅傑斯同超人一樣，認為買樓自住冇問題，投資就唔好嘞，事關樓價不斷升，只係環球持續低息環境所致，一旦加息，樓價隨即回落。

無懼波動　續撐A股

羅傑斯一直係中國市場大好友，即使A股近年大上大落，阿爺嘅救市措施又嚇親街坊，佢都繼續撐A股。佢講明，會替兩個寶貝女嘅養老金賬戶買A股，指A股係未來幾十年嘅市場焦點，家陣係時候買入長揸。
不過，睇番上證綜合指數較舊年6月高位5166勁瀉超過四成，大家跟唔跟真係要諗清楚。
至於美元近期跌到一仆一碌，羅傑斯透露，仲做緊長倉，因全世界都睇美元為避風港，佢繼續買入。
假如美元出事，先考慮轉買入人民幣。羅傑斯又話唔好畀現貨金價呢轉升浪影響，𠵱家買金時機唔啱喎。

李華華
mailto:[email protected]