當年今日
關於我們

李八方online︱《國安法》下法律周 國安公署副署長登堂合照

蘋果日報 2020/11/02 20:17

國安法李八方online法律周李江舟

律政司今日喺前終審法院舉行「法律周2020開幕禮」,致辭嘅人士有特首林鄭月娥、終審法院首席法官馬道立同律政司司長鄭若驊,就一啲都唔令人意外,但呢個「港版國安法」之下嘅首個法律周,多咗位「貴賓」獲邀到場兼上台影大合照,佢就係國安公署副署長李江舟嘞。
其實李江舟除咗喺位於銅鑼灣嘅公署辦公室開幕嗰陣,喺「特選傳媒」在場採訪下亮過相之外,都未有喺公開場合出場。雖然可能有人覺得,中聯辦同外交部都有代表在席,李江舟以駐港機構代表獲邀出席都好合理,之不過咁,國安公署凌駕港府,警方又無權干預,地位咁超然,副署長成為貴賓仲可以登台合照,未必冇微言大義。
民主黨立法會議員涂謹申就話嘞,由於法律周一向係推廣法律知識,今次咁樣嘅安排,可能都係想表達《國安法》之下,《國安法》比一切法律更重要,「起碼政治上表達到呢種含意」,可能好想「提醒」大家,只係認識香港以前享有嘅法律唔夠㗎,叫大家唔好亂嚟。又係嘅,有咗《國安法》,香港從此不一樣,變得好定壞,大家「有目共睹」。
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁