【新增內容】
韓國天團BIGBANG嘅30歲成員T.O.P，於去年2月入伍後被爆跟練習生前女友韓瑞希喺寓所內吸食大麻，最終被判10個月有期徒刑，緩刑兩年執行及罰款12,000韓圜（約84港元），本身以義警身份當兵嘅T.O.P，亦因為大麻案而被革職。

由於T.O.P尚有520日要繼續履行當兵義務，所以對於T.O.P嘅兵役亦有新安排。據知T.O.P被派到首爾龍山區政府進行社會服務中心，以社會服務要員（即公益兵）繼續服役。而T.O.P今日就全黑打扮、包到冚咁現身首爾龍山區廳，戴住冷帽、口罩嘅T.O.P甚至連樣都睇唔到，隨後T.O.P喺工作人員陪同下進入室內進行內部面談，據悉T.O.P將被分配到漢江鎮站前嘅龍山工藝館繼續服兵役。

不過據韓媒《YTN》報道，T.O.P原定韓國時間今早9點抵達龍山區廳，不過卻遲咗約10分鐘先現身。而當佢搭上電梯後，並未到管理替代役嘅7樓安全災難科報到，而是直達9樓嘅區長室進行個別面談，但喺該區廳服役嘅替代役表示，自己首次上班時並冇收到類似嘅面談通知，T.O.P疑似受特權再引起爭議。不過龍山區廳嘅相關人士就指，龍山區廳並非T.O.P嘅服役單位，T.O.P僅進行約30分鐘嘅面談就離開去最終服役地點。

更多韓流，喺晒《娛果》
http://fb.com/appledailyent