早兩日拉利記招，見到架California即時手痕想試車，靚女PR冷冷回答：「咪玩啦。」我都知未出牌唔揸得，全港又僅得一部Demo，要試都係劉生、城城先喇，明嘅！好彩返到屋企開PS3隻日版《GT5P》，諗住揸架F430頂癮，點知失驚無神有升級檔《SpecIII》下載，20分鐘Download完畢，拿拿臨Click入各大車廠睇吓有乜新車；原來巴黎車展兩大熱爆新車GTbyCitroen概念車同今日介紹嘅California都有，可惜架Citroen叫價一億，有排儲獎金，反而California只需三千萬，Trade幾架舊拉利已買到，即試！

第一次揸開篷拉利，感受果然與別不同，車櫳開揚，盡收沿途美景，唔使急亦唔使快，滋油啖定漫遊倫敦街頭、EigerNordwand，好正！Hea完正式劈車，升級至《GT5PSpecIII》後，明顯更易打滑，而轉為FR（頭偈尾轆）後嘅California更甚，直線加速係好有爆炸力，不過入親彎都經常性失控甩尾，索性改為《頭D》揸法，由於引擎馬力同扭力大，甩至彎心時能好有力咁抽離彎道，習慣一輪後開始得心應手，又幾好甩喎，邊個話拉利唔劈得彎！