四川大地震死傷無數，卧龍大熊貓基地一度同外界失去聯絡，幾十隻國寶安危令人擔心，香港海洋公園都有四隻嚟自四川嘅大熊貓，專家指動物對天災好敏感，出事前會行為乖張性情突變，內地日前就出現幾十萬隻癩蛤蟆隨街跳恐怖場面，嚟自四川嘅大熊貓，呢兩日有冇異常呢？
海洋公園方面話，前日地震時幾隻大熊貓都冇異常表現，八方噚日透過網上直播，睇吓幾隻大熊貓有冇受地震影響心情，行為有冇唔妥；好彩，佢哋望落好正常，同平時一樣懶懶閒，大部份時間唔多郁動，偶然喺熊貓館內四處踱步。佢哋落戶香港養尊處優，正一樂不思蜀，對四川地震冇感覺都唔出奇。