方廐旺番唔係人咁品，禮拜三谷草起完孖，呢日第六場跑唔係主場之泥地，都可以憑「雲呢拿」建功，追番近大摩一win。
「雲呢拿」係雪糕其中一種主流味道，當然要凍至好食，此駒上季尾由湯智傑爆51倍大冷win贏三班泥地千八米開齋，今次由郭能策騎爭同班同程，十四檔出閘沿途留後，拉士從大外欄如飛殺上，連大熱門走甩晒之「搖錢樹」都頂佢唔到，爆出15倍冷win重響勝鼓，幫埋呢件綵衣打開今季勝門。
至於幟哥黃永幟之團體馬「搖錢樹」，最後幾分鐘由8.5倍過外落至3.8倍大熱開跑，涉及注碼約300萬，孭輕磅抽埋一檔，直路透出落飛黨諗住贏梗，但最後兩步無力抗衡「雲呢拿」輸頸位，令落飛黨一殼眼淚。第三名由韋達策騎「凱歌動」臨門冚過「優勝」拎到，後駒跑梗頸四。
「雲呢拿」馬主蕭劍平同父親蕭百君、細妹蕭劍瑩及細佬蕭劍新，合共養住十多匹現役馬，一直係本地最大馬主家族。今季佢哋原本只係憑團體馬「銀飛龍」贏過兩場，呢日前駒終於爭氣，成為蕭家軍今季首匹勝出之個人名下馬。