【開騷在即】鄧小巧今日開賣如睇股市 黃妍搬離屋企閉關練習
蘋果日報 2019/09/24 15:09
鄧小巧黃妍
攝影：馬建華
鄧小巧今日到商台宣傳新歌及12月初於麥花臣場館舉行首個演唱會，門票今日正式公開發售，她笑指一早起身，如留意股市升跌般望實銷售情況，她開心透露只賣剩少量中、低價門票。至於會否加開一埸，她表示要跟公司開會商議，場地是有預留加場安排，問到會否大擦一餐慶祝反應理想？她笑說︰「我平時每餐都會食得好，可能獎勵下自己飲杯香檳。」
歌單已經揀選好，現時安排編歌工作，月底便進行排舞，問到舞蹈會否令個騷沾上污點？她說︰「我自己覺得未去到污點，我都有學過，同埋唔會做出嚟令人覺得尷尬。」她表示跳舞部份並非連續6、7分鐘的群舞，可能是配合歌曲在舞台上的姿態演繹，因為企定定唱歌會感覺奇怪。
此外，黃妍與Edward Chan今日亦到商台宣傳下月初舉行的演唱會，距離開騷不夠兩個星期，經已開始騷前預備工作，她透露最近搬離屋企，租住酒店閉關練習，她說：「而家無人知我住喺邊，閉關進度非常好，因為喺屋企會好多嘢做，搬咗出嚟就可以專注好多。」
擔任今次演唱會音樂總監的Edward Chan非常贊成黃妍此舉，因為過程中能夠學習獨自去解決問題，他笑說：「無受過高等教育係唔會成長。」今次演唱會是圍繞新專輯的歌，Edward Chan指其中一個元素是一年四季，希望令入場觀眾親身感受到有如經歷一個旅程，相信能增添整個騷的趣味性，演唱會嘉賓邀得師兄陳柏宇，黃妍笑指最期待是見到陳柏宇囡囡Abigall。
採訪、攝影：馬建華
鄧小巧宣傳新歌兼演唱會今日開賣門票。
黃妍與音樂總監Edward Chan今日到商台宣傳演唱會。