新地第三代豪宅跑馬地禮頓山入得伙，明日開始交樓，蘭西噚日率先參觀，親身體驗一吓呢個百億豪宅有幾豪。去到之後，諗起兩年前個盤重係爛地一塊，估唔到兩年間，已變成氣派不凡嘅超級豪宅屋苑。香港人辦事效率果然高，同樣規模嘅物業，喺外國可能要十年八載先起好，若然落在偉大的官僚手中，分分鐘重種緊草。
禮頓山九八年招標，由新地以三十六億投得，前年底賣樓花，短時間套現九十億。
為咗慶祝禮頓山聽日交樓，新地邀請王仁曼嘅高足，喺池邊跳芭蕾舞，又請到曾經款待過唔少名人如戴卓爾夫人、克林頓嘅大廚，整咗啲精緻又高級嘅美食招呼新聞界，睇盤之餘感受吓富貴生活。

海名軒租盤經紀戮力拉客
曾經係熱門話題嘅紅磡超高豪宅海名軒，入伙冇幾耐，錄得第一宗租務成交。二座中層B室，望鯉魚門，千九方呎，以四萬二租出，計埋差餉、管理費同地租，合共五萬多元。
做成呢單租務嘅中原地產，分區經理李玉祥話，傾咗三個禮拜至搞掂。其間租客要求業主出示銀行同意書（最後唔使出示），而兩個月按金，租客就搵銀行做擔保（即唔會直接畀業主）。
呢個業主只係買咗一個單位用嚟收租。市場上放租有成二十幾個，叫租每呎二十七蚊起。