【有靚聲冇靚樣】囝囝身上睇到簡單就快樂 蘇永康：我唔係唱片歌手
演唱會 蘇永康
「爸爸離開之後，我有一段時間責備自己，點解唔講出口：『爸爸，我其實好愛你！』但當我再大啲，經歷幾年驚濤駭浪之後，你會明白生活裏唔會冇遺憾！」蘇永康（阿公）說。
為了減少遺憾，2014年跟第二任太太馮翠珊再婚後，阿公停工了1年，前年誕下兒子Jazz，那年49歲的阿公笑說：「年過半百做老竇。」就快踏入52歲的阿公，現真正過了半百之齡，兒子Jazz快滿2歲，7年沒開個人演唱會的阿公，將於6月再踏紅館開騷，演唱會取名「ALL THAT JAZZ（AND POP）LIVE」，講父子情的新歌叫《ALL THAT JAZZ》，Jazz－－成為了他人生的重點。
阿公認為婚姻要終生學習：「但小朋友一定令你學識好多嘢，從佢身上睇到簡單會好快樂，其實呢樣嘢已經忘記咗，因為我49歲先生BB，嗰時太太都四字頭，大家喺社會上工作咁耐，腦袋好多data塞到爆晒，但小朋友個腦好似海綿，到佢歲幾開始學講嘢，談話要非常之小心，因為最近佢開始講『嚇死人啦』，但我同太太都冇講，可能來自工人姐姐嘅口，我哋聽到呢啲，首先嘗試改正佢，教佢多啲名詞例如『抱抱』，而且我哋年紀大要小心正確抱法，我太太最近就出咗事，要敷暖水袋，呢樣自己會好小心，因為年紀唔係細。」
做了爸爸後，阿公學識面對小朋友要有耐性：「好直接，你有幾多愛賦予落去，就會有幾多愛返轉頭，有次太太仲喺意大利，我啱啱公幹完返嚟，咁啱囝囝喺流感邊緣，38度，又屙，醫生話冇39度唔好帶嚟，嗰兩日我喺屋企對住佢，好踏實地做一個父親要做嘅嘢，每隔兩小時探熱，留意bubu有冇事，嗰吓我形容痛並快樂着，因為小朋友唔精神，你個心係唔舒服，所有父母都係，你（小朋友）嘅痛擺喺我度先，但係快樂着，佢真係全日一嚿棉花咁黐住你，好似咁耐以嚟都未試過。」
85年參加新秀入行的阿公，有一把靚聲卻沒有靚樣，等了4年才推出首張唱片《失眠》，歌聲一鳴驚人，其後推出的《越吻越傷心》、《從來未發生》、《那誰》，大家都公認他唱得好；阿公將於6月再踏紅館開騷，入行34年的他，對上一次開個人紅館騷，卻已經是7年前：「都7年之癢啦，中間做咗BIG FOUR同男人幫，我有自己rundown，擔一個演出冇生疏，但唔覺得可以擺上紅館，直至17年參加澳門藝術節，裏面同澳門中樂團合作，自己歌曲偏向爵士，好似將好多年嘅friend，幫佢換晒啲衫，覺得好fresh。嗰晚唱完最後一首歌，坐車走我仲喺度嗒緊糖，經理人話入紙囉，你知紅館要早一年入紙，結果得到呢個期，今次邀請廣州中樂團合作，台上over 90人，應該好墟冚。」
純粹賣唱的阿公，演唱會從沒有舞蹈員：「好彩我又應付到，首先自己節奏明快嘅歌唔多，咁排得幾多舞啫，盞搞，舞蹈上真係冇乜花臣搞到，因為我唔係唱片歌手。」有否覺得回報跟才華不成正比？阿公坦言：「我幾享受而家自己嘅位置，好多年前，我已經學識唔好人比人，人比人就比死人，最緊要自己知足，而家有句說話用得幾濫，就係毋忘初心，我做乜事參加歌唱比賽先？我唔係想做明星，我只係想唱歌，咁多年我都係一個歌手嚟，我副業係演員，唔工作時候唔多曝光，你唔係唔踏實地做一個歌手，唔係唔踏實地唱歌，我覺得咁樣已經好足夠，最緊要自己把尺點擺，我反而好感恩，你估喺度等就畀你等到，我好幸運地有三、四個唔錯機會。」
髮型：Moe @ Fifth salon
《Captain Marvel》完全導讀本
第二屆最港電影大獎投票網址