鍾嘉欣（Linda）同相識10個月、拍拖半年、貴為無綫集團前主席梁乃鵬嘅脊醫姪仔Jeremy閃電結婚，佢仲默認有咗BB。嘉欣喺香港時間前日為單身日記畫上完美句號，佢喺facebook上載同老公深情對望嘅婚照，然後簡單寫上一句：「謝謝大家的祝福！」本報記者喺嘉欣加拿大愛巢門外日夜守候，仍然未見新婚夫婦蹤影。
鍾嘉欣揭開人生新一頁，噚日佢喺微博留言再次向所有人致謝，又守承諾公開咗自己為婚禮所作嘅歌曲《我結婚了》分享喜悅，鍾嘉欣話：「之前應承過會將我自己作曲的新歌《我結婚了》放上微博同大家分享結婚心情，希望大家會鍾意！My new chapter in life begins……lovelovelove。」

親手製回禮盒

一班處女黨姊妹團岑麗香、李亞男、苟芸慧、王君馨將各有各忙，佢哋喺臨別前再次茶敍，噚日王君馨上載合照話：「原來可以在公眾地方，簡簡單單一齊飲咖啡可以咁開心……」之後香香轉飛美國，李亞男留喺溫哥華探親，苟芸慧喺加拿大拍嘢。
另外，主播何詠雯前晚出席婚宴之後，上載咗一張婚宴回禮盒嘅相，上面寫上LJ英文字樣，盒邊更鑲有閃令令嘅碎石，何詠雯話全部都係嘉欣親手做，Linda同Jeremy嘅英名簡寫LJ都係由嘉欣親手寫上去，真係極之有心思同誠意。
撰文：馮仁昭