近排電子煙同加熱煙議題非常惹火，政府提出規管呢類新煙草產品，但無禁售，隨即被批評係倒退，醫學界嘅聲音尤其強烈。今晚公共醫療醫生協會（PDA）同政府醫生協會（GDA）晚宴，新鮮出爐嘅GDA會長李慧茵致辭嗰陣，就喺座上客、食物及衞生局局長陳肇始面前，表明醫生要不忘初衷，希望電子煙唔好輕易放行呀。

呢位敢言嘅新會長，係GDA歷來首位女會長，喺衞生署做感染控制。佢話自己一有機會，就會勸人戒煙，就算係為退伍軍人症做家訪，都會搭單講兩句。

隨後上台嘅陳肇始都有回應，話政府對吸煙有害健康嘅睇法同醫學界一致，叫醫學界放心。佢話，立法過程要考慮好多因素，政府聽到醫學界聲音，知道大家期望政府做得再強硬啲，會深思意見同搜集更多證據，不斷努力做應該做嘅嘢咁話。

李慧茵又話，衞生署醫生面對青黃不接，除咗退休潮，新人亦難請，空缺率超過一成，大西北嘅母嬰健康院最缺人。佢話，新入職同舊人嘅聘用條件唔同，希望可以爭取到改變現況，例如取消獲聘後3年至6年必須通過首階段專科考試，先可以轉長工嘅規定。