日本男子組合EXILE嘅30歲型男主音TAKAHIRO,今年1月忽然同23歲嘅AKB48舊將板野友美劃清界線,及至今日先至知道真相,原來佢當時同日劇《戰力外搜查官》拍檔武井咲去澳門取景數天成功撻着,有人偷拍到佢哋喺澳門開工期間,就算鏡頭外都一樣糖黐豆,日前TAKAHIRO仲半夜戴住口罩去武井咲嘅香閨逗留三個鐘,證明大家關係非淺!
TAKAHIRO火速換畫戀上年僅21歲嘅武井咲,有附近鄰居爆料話,男方其實同一星期出入武井咲寓所至少兩次,由於武井同媽咪同住,所以TAKAHIRO已見埋家長,相信感情都開始穩定。
雖然已經斷正,但雙方事務所都例牌否認戀情,武井事務所指兩人只係拍檔關係,解釋當晚武井招待好友們到家食火鍋,邀請咗TAKAHIRO同埋其他朋友,武井媽咪亦在場。至於TAKAHIRO方面,佢近日上節目受訪就大讚只得16歲嘅矚目新人廣瀨鈴好似天使咁可愛,希望有機會見到真人,此話一出惹來唔少網民批評,話佢咁講好有孌童嫌疑,睇怕廣瀨鈴已為TAKAHIRO嘅新目標。