鄧紫棋(G.E.M.)、韓星金始炫同馬天佑噚晚喺灣仔出席izzue 2017秋冬時裝展，「時裝車禍」G.E.M.身穿sport bra top配全黑西裝現身，問佢係咪去時裝騷取經？佢話：「最近喺時裝上都學習緊，開始愛上，mix & match過程好開心。」

咁，o依家嘅着衫品味係咪好咗？G.E.M.就話：「開始搵到鍾意嘅，清楚乜嘢唔適合我，例如少着緊身短裙，因為我下腹脹氣，無論幾努力練馬甲線都冇用，尤其是食豆就會更多氣。」

But，G.E.M.都有佢嘅堅持，例如，皮褲。

G.E.M.話：「我發現咗條運動皮褲，最近比較喜歡街頭同休閒啲。」

衣着品味一直受劣評，G.E.M.就話：「個個女仔都想靚，我會keep住學習嘅心，唔會因為話着乜唔靚就一世唔着，唔好在意其他人嘅眼光，最緊要有自信。」咁男友有冇讚妳衣著品味好咗？「身邊嘅朋友都多咗讚我。」又反問：「已經用呢個代名詞？我稱佢為stylist，佢畀好多意見。」

提到老友超蓮，佢就話近期兩個人見面主要講慈善，G.E.M.啱啱成立咗自己嘅charity，嚟緊會搞大型戶外活動同服裝義賣。

金始炫同G.E.M.現場大派心心，G.E.M.笑始炫好怕羞，自己曾經追睇呀Rain嘅《浪漫滿屋》，佢話：「距離就是美，會好多幻想。」

19歲嘅始炫第一次嚟到香港，為品牌行騷，佢話感覺好新鮮，仲話去過尖沙咀海旁睇夜景同嘆中菜，問到佢識唔識香港嘅藝人？始炫話：「成龍，韓國沒有男生不認識他，他用了很多年時間練功夫，十分欣賞他，真的很想跟他合作。」