當年今日
關於我們

【飲食經典】蘇施黃|好玩期貨啤牌

蘋果日報 2019/03/21 19:00

遊戲蘇施黃啤牌專欄

股市勁升的時候,有時都會覺得自己很笨,就連街市賣菜的阿毛都識錢搵錢,我都是聰明女,為何只懂得人搵錢,搵來搵去只夠食,磚頭都冇嚿。已經多次立心要學吓錢搵錢,炒吓股票,炒吓樓,可能真的性格不近,講完就算,所以又發唔成達。

不過股市狂跌時,心裏又會暗暗高興自己的愚蠢,學極都不會炒炒賣賣,不然粥都冇得食。以我的性格,一係像現在完全不懂,不炒,俾着我懂少少我都會同你死過,以為投資有一蚊都炒到盡。我現在真叻呀,全部投資在我的肚內,人人都見到我像五月懷胎的肚腩。另一樣常俾朋友笑的是我喜歡用紅簿仔,我要見到銀碼的,我要隨時見到,不是月結單,一個月才可望一次自己的身家。我又不用phone banking,當然更不用e-banking啦!我鍾意排隊,打簿,有收據的,老套死。不過老套死有老套死的好處,而家大家就知,開埋啲三合一戶口,因住銀行唔保你啲錢呀!

姊姊的女兒回來,買了一盒玩具「Pit」給我。「Pit」有點像我們細時玩的「開鋪頭」,「開鋪頭」是先每人選擇一樣鋪頭去開,如雜貨鋪、雪糕店、米鋪……然後每人派二十或十五隻啤牌,一、二、三,一齊開一隻牌,如我的牌是King,你的又是King,就鬥快講出對方鋪頭內一樣有得賣的東西。聽落很容易,真正玩的時候,永遠是急到想不出對方開甚麼鋪,只懂得狂指對方,然後啞口無言!

「Pit」都是card game,遊戲有八種不同的期貨如金、銀、油……每種期貨有八張,另加一張牛市,一張熊市。洗好牌便每人派九注,其中兩人有十張,遊戲目標是鬥快trade到八張一樣,牛市可當百搭,但熊市乃衰牌,要扣分的。派好牌,一叫開始,大家就開始叫「一隻,一隻」,「兩隻……」,「四隻、四隻……」,如你叫兩隻,對方又想換兩隻牌,便會和你trade,你可以想像一開始trade,跟住的五分鐘,嘈到要命,不過,一個simple game帶來的歡笑真大呢!我試過trade到手上得三隻牌,因為別人拿了你兩隻牌,本應你要拿回對方兩隻牌,可是第三者又來拿牌,自己又去亂拿牌,結果真的笑到瀨尿!Good Game!

Pit網頁: http://winning-moves.com

(原文刊於2009年713期《飲食男女》)

蘇施黃Profile
資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。

立即免費下載《飲食男女》App : http://onelink.to/etwapp
《飲食男女》網站 : http://etw.hk