田泰安今期（23日）停賽，第七場由佢騎開嘅明星馬「遨遊戰士」易配潘頓。

安仔本月5號谷草夜賽策「任我行」犯規，已決定揀今日同嚟緊禮拜三（26日）停賽，即係「遨遊戰士」上月中被破金身後，他好快已知道自己保唔住帥權。

目前喺泰國布吉度假嘅佢，唔知今日會唔會上網睇賽事直播呢？

除「遨遊戰士」外，第五場四班1200米草地賽一向由安仔主理嘅「閃電俠」，亦由潘頓接手，估計是大熱身份。

上場「閃電俠」排大外檔，全程都遇上銅牆鐵壁，內叠冇任何空位給人馬移入，此駒全程蝕位走大外叠，最終只輸3.5個馬位得第六，呢個名次已算收貨。

「閃電俠」本月14日試泥閘仍由安仔操刀，但走勢欠奉，而且直路更墮退，表現真係唔開胃，練馬師蘇保羅向解釋話「閃電俠」途中被泥頭擊中，而且唔太鍾意喺泥地跑道奔跑，所以試閘表現唔作得準，估計跑番草地會截然不同。

安仔明知自己今場冇得再騎「閃電俠」，仍幫手操馬，反映隻馬有一定份量，今次「閃電俠」排檔大幅好轉，喺第5檔起步，當然係牌面分子。

-----------------------------
7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX