新聞統籌專員（IC）馮煒光去年10月，畀八方報道佢喺尖沙嘴dry爆，一支公行完書店再轉戰戲院後，今日八方問佢，聽日出席港台城市論壇前，有無事先通知老闆梁振英時，馮煒光即自爆「喜訊」，叫八方可以報道以下兩句重點回應：「我禮貌上通知咗老闆，我感情上就通知咗女友」，首度宣佈已結束dry爆生涯。

蜜運中的馮煒光稱，女友聽到他聽日出席城壇感到「好開心」，一度想明天現身撐場，但馮煒光為不想女友被傳媒拍下容貌，影響平日生活，改建議女友明天去「飛滑翔傘」。佢話女友一向擅於「飛傘」，是「三非」人士，「即係非政圈、非媒體、非政府」，但就為保護女朋友，唔肯透露其他詳情。

問到佢幾時開始脫離dry爆生涯，馮煒光甜笑指「唔多講嘞」，及後先補充指係八方去年10月報導佢dry爆後先開始，「其實八方話我dry嘅時候，我都差唔多拍架嘞，我唔出聲之嘛，或者多謝八方寫完之後，佢(女友)就覺得不如同我拍，等我無咁dry啦，哈哈」，透露女友平日亦鐘意睇《蘋果》，因為《蘋果》係份好流行嘅報紙喎。