嚟到爭標關頭，真係咁大壓力？荷甲球隊飛燕諾本來喺剩番兩輪聯賽下領先次席阿積士4分，只要周日作客下游嘅精英隊全取3分，就可以自1998/99球季後一搔18年聯賽錦標之癢，點知佢哋下半場10分鐘內連失3球，精英隊靠荷蘭名將侄仔尼祖哈索賓基喺56分鐘開紀錄，之後喺59同65分鐘再下兩城，埋單3:0淨勝呢支鹿特丹同市宿敵，搞到飛燕諾捧盃要hold住！

由於阿積士同日主場4:0大勝榜尾伊高斯，賽後追到落後一分，兼踢對方降班，令兩軍要鬥到最後一輪定出冠軍誰屬。不過，飛燕諾煞科日主場只係對住中游球隊荷華高斯，喺地頭全取3分封王應該okay嘅，至於阿積士煞科日就要作客另一支中游隊威廉二世。