當年今日
關於我們

杜汶澤撰寫戒煙日誌跟住做得唔得?

蘋果日報 2014/02/07 06:00

田蕊妮戒煙杜汶澤牛仔日誌

吸煙除咗引致肺癌之外,令市民最頭痛當然係啲煙價一年一年咁加,嚟緊仲話加到成八十蚊包,到時真係「搵鬼食」。

好似有多年煙齡嘅杜汶澤,呢期下定決心戒煙,戒唔戒成功就唔知,但睇佢日日喺FB好有誠意咁分享佢戒煙嘅奮鬥史,真係要幫佢加加油。

阿澤由年初一擺咗張著熄嘅煙開始,就好有決心話俾大家知:「Mylastcigarette......馬年第一關!戒煙!」點知戒煙第一日就話早上難適應,出現想抽煙念頭幾次,午餐之後出現頭暈,但好彩情況都樂觀。第二日明顯慾念減少,佢仲留言話:「別人抽煙時,開始覺得煙味有點臭。情況樂觀。」

原來以往每朝起身都會食煙嘅阿澤去到戒煙第三天,點樣去解決呢個問題喇,就係用打坐時嘅一呼一吸去替代。

而去到戒煙第五日,阿澤都留言話,忘記咗第四日嘅感受……唔知係咪戒煙決心堅定,去到第五晚瞓覺都發夢同煙有關:「昨夜發了一個夢,在夢中我抽煙,可是突然想起自己在戒煙,但是又再突然想起自己在做夢,於是乎,對自己說:『沒事的!做夢抽煙不傷身,好好享受吧!』我還以為自己失敗了,醒來才知道,我沒有放棄!戒煙的第六天。」

原來阿澤戒煙嘅最大目的,係為咗老婆田蕊妮:「我不怕死,只怕老來身體差,辛苦自己時,亦難為了別人要去照顧你。」

去到今日第八日,佢貼咗張年青時被吸引住嘅廣告海報——之唔係萬X路嗰個西部牛仔。當時阿澤只感到對方騎著駿馬在野外奔馳,感覺很自在吸引,但依家就好有決心咁話:「Don'tbelieveinfakefreedom,stayfreefromattachment!Goodbyecowboy!」

呢位西部牛仔,叫做勞森,上月初喺加州病逝,享年72歲。死因係同吸煙有關嘅慢性阻塞性肺病。據報道指,過去有兩名曾經拍攝萬X路廣告嘅演員,先後於1987及1995年,死於與吸煙的有關的疾病。

戒煙!加油!