隨住山竹遠離香港，相信大部分香港人，噚晚都可以暫時鬆一口氣，安心瞓返場覺。但一班香港眾志成員，包括蔡俊賢、梁延豐、同埋露腰造型有啲似「港版羅拉」嘅金髮何嘉柔，就喺今日凌晨組成小隊，戴住手套攞住小型鋸刀，擸架生型爆現身社區同馬路，氣勢凌厲莫非搞場大茶飯？

原來呢班眾志員有見山竹吹襲過後，四處都有幹道或行人路被倒下嘅樹木阻塞，所以凌晨自發協助移除倒塌樹木，希望除咗由前線清潔工辛苦清理外，香港每個人都可以為自己社區出一分力，幫手清理啲小型垃圾，據聞型爆小組清理至天光先收隊。

眾志喺Facebook話，天一光，街坊就要趕去返工，但係街上面仲有咁多潛在危險，仲要花好多時間先有得上車同人逼嚟逼去，真係辛苦一班打工仔，「其實澳門都有得放一日假等處理好街上面各種情況先，點解香港都仲要逼一班打工仔辛辛苦苦翻工？」

唔少網民都讚眾志成員呢次自發行動，但亦相當擔心佢哋嘅安全，叫佢哋清理垃圾時要做足安全措施，例如最基本嘅安全帽、反光衣一定要配備，希望眾志成員下次唔好令大家咁擔心喎。