有時啲嘢，你都咪話唔邪。話說有外國網站喺「雙紅會」之前，就搵出啱啱轉會曼聯嘅阿歷斯山齊士，過去幾季代表阿仙奴出戰利物浦嘅數據，發現呢位智利前鋒7次對利物浦，只嘗1勝，仲要試過輸3場添。

外國網站《Sport Mole》就搵返山神過去4季出戰利物浦嘅數據，對賽7次，錄得1勝3和3負，射入2球，送出2次助攻。贏嘅一場，就要數到14/15球季，阿仙奴喺阿聯酋球場以4:1大勝利物浦，山神射入個場兵工廠贏嘅第3球。但係，山神再對紅軍入球，就已經要等到今季阿仙奴主場對利物浦嘅比賽，佢接應比利連傳中頂入，而其間已經相隔咗240分鐘嘅比賽時間。

當然，唔少紅魔球迷可能會覺得呢個數據得啖笑，因為呢啲只係適用於阿仙奴，山神加盟曼聯就係第二個世界。不過，亦可能有唔少曼迷覺得唔出山神更好，原因唔係因為呢個數據，而係近期表現實在唔好。上仗對水晶宮，山神被垢病上腳太多，而且因為目標太大，成日被對方搶甩，單係上半場係佢腳下已經甩咗19次波，仲被加利仔同加歷查兩位名宿狠批。今晚一戰，就睇下山神可唔可以爭返啖氣！

-------------------
永不獨行！利物浦 FC 當季球星降臨《BFB》！立即帶領紅軍，創造新輝煌！ http://bit.ly/2oQObi1