【智取大市】科技股勢掀龍尾熱潮（晉佳）
蘋果日報 2020/06/21 15:42
科技股晉佳智取大市
美股受到武肺疫情升溫拖累，由升轉跌，令港股黑期下跌超過300點，加埋「港版國安法」草案內容比預期仲要辣，相信周一港股跌幅只會更大。條例一日未出，外資面對政治風險嘅疑慮猶在，而弱勢本地概念股恐再被沽。
星期五美股先升後跌，主要因為疫情第二波，美國單日確診宗數「旗形突破」，巴西疫情更加係投降式爆升，全球新增個案大幅破頂。蘋果公司宣佈再度關閉部份店舖，睇怕重啟經濟分分鐘要等到疫苗出年初大規模應用，先至可以解決，究竟美國經濟有冇能力去承受？目前形勢係，美國經濟向住悲觀劇本發展，勢必再有救市措施，同時資金仍然氾濫。
即使3月面對疫情兼流動性危機，都打唔低科技股，相信喺聯儲局以阻止流動性危機為首要任務嘅今日，科技股泡沫難以阻止，調整相信有限，真正令科技股見頂嘅因素，係超買。疫苗股MRNA逆市升醞釀突破，其次係疫情贏家科技股會較快見底回升，當中包括本來已破頂、但周五跟隨大市回落嘅TWLO、ZS之類。
科技股其中一個走勢現象，就係一經歷調整後，重展升浪會加速。另一方面，炒風由龍頭炒到二、三線，百億美金以上嘅科技股、中概股都炒起晒，跟住可能向更細市值股份進發，情況就似2015年港股大時代4月底大價股見頂、5月喪炒細價股嘅趨勢，值得做定準備。
晉佳
https://www.facebook.com/advanceguy1
-----------------------------
-----------------------------