由少爺占、小胡、Chris、DJPong、Wilson和Ming組成的野仔，前晚在九展StarHall舉行「野仔18戀來演唱會」，獲不少圈中人捧場，場面熱鬧。小爺占更邀得潮媽陳慧琳和HotCha做表演嘉賓，加上六子的忘形演出，令觀眾high足全場。

不過前晚音樂會卻不時發生蝦碌嘢，當Kelly主動埋身磨少爺占背脊合唱《紀念日》時，喱士裙的Kelly後幅裙子卻不慎下滑，險些走光；及後到HotCha表演，她們一上台就抵死稱少爺占為uncle，之後她們又表演不同的樂器，不過Regen彈結他時一度彈不出聲，令她大感狼狽。
音樂會臨近尾聲時，野仔結他手小胡的結他弦連斷兩次，幸好觀眾情緒高漲，起哄要求野仔重唱，被觀眾熱情感動的野仔亦在台上落淚，他們更即時除掉上衣送給一名被偷銀包的女粉絲。
完場後六子接受訪問，少爺占坦言估不到觀眾的熱情由頭帶到落尾，少爺占十分感激Kelly二話不說就來做嘉賓，他說：「其實頭先唱唱吓時見到助手上台同佢拉衫，但Kelly卻轉個頭嚟睥我，可能佢以為我整，不過好彩都有驚無險，大家綵排時亦冇辣身舞o架，真係好多謝佢，Kelly仲要冇着高踭鞋嚟就我，令我哋距離拉近。」
採訪：馬建華　攝影：陳俊強